كل قصة والها تجربة :استبدال رخص القيادة الاجنبية برخص قيادة اردنية

بسم الله الرحمن الرحيم
استبدال رخص القيادة الاجنبية برخص قيادة اردنية
استبدال الرخص الاجنبية برخص اردنين
ملاحضة الموضوع فيه قصتي بالكامل كيف انتصب علي لين كيف طلعت الرخصة المهم لو موحاب
تشوف القصة تقدر تنزل تحت اخر شي وتشوف شروط استبدال الرخصة
في هذا الموضوع رح احكي عن كيف انتصب علي ب70ليرة وكيف تعرفت على قصي
مثل العادة كنت شغال في الكافتريا في توصيل الطلبات واجا يوم وتعرفت فيه على قصي الي بدو يضبطني ويضبطلي وضعي وهو وضعو ازفت من الزفت
بالمناسبة الزلمة عمره 28سنة متزوج ووضعو زي الزفت سكان عين الباشا المهم ماعلينا من التفاصيل خلينا ندخل بالموضوع على طول
تعرفت على الزلمة وحكيتلو قصتي اني كنت مقيم بالسعودية وجيت لاردن فهون الزلمة فكرني بنك متحرك وقال اجا الهامور الي بدنا ننصب عليه
نصبة الموسم فالزلمة قالي بضبطلك احلى رخصة بعد ماعرف اني مزنوق على اني اطلع رخصة سواقة قلتلو تمام كم بدك قال هات 35ليرة
وانا هون ياجماعة كنت واثق من الزلمة مليون بالمية يعني لوطلب عيوني بعطي لو طلب كل راتبي كان اعطيتو عادي لاني شفت الزلمة 100% وزلمة
مستقيم مستحيل يكون نصاب بكفي انه بصلي وبحكي كلام حلو وبناقش في الدين ومن هون انا حبيت هاد لزلمة على دينو وتقواه
وغيره هيك والي خلاني اثق في اكثر انه قالي انه مدرب كارتية وحاصل على الحزام الاسود من المرتبة الثالة فبلاه عليكم واحد زي هاد مابتثقو في ؟
وقالي كمان تعال عنا للنادي وهضبطك ورح اعطيك بدلة مجانا ورح اخليك وحش ومن هالكلام الي بياكل عقل الواحد وانا قلتلو اوك بجي عندك يوم
لاني بدي رياضة اتسلى فيها شوي بعد تركي للجيم والجيم كان احلى شي في حياتي كان جسمي مفتول وكنت معضل كنت اهبل لما بمشي بالشارع
كانت مشيتي شوية مخبطة لاكن كنت احس بثقة رهيبة فياخوان اي حدا يشوف واحد مجسم او معضل لايستغرب من مشيتو لانه جد هيك مشية
كمال الاجسام والي بيسوي حديد بيجيك واحد بقولك احنا انحرقنا من كثر الشغل بيكون هو صنايعي وبشتغل كل شي بيهد حيط وبيسوي امور كثير بتتعب
النفس وتقوي الجسم وبيصير متل البغل لاكن بيقولك مشيتي عادية ولا فيها شي انا هون بتفق معك 100% يامعلم برياضية كمال الاجسام لما ترفع
الدمبل بيكون وزنو شي وقدرو بعدين الدمبل مش بس بنرفعو احنا بنرفع الدمل وبنسوي في حركات والحركات هاي بتئثر على الجسم بشكل خرافي
ومن الطبيعي انه حركة لاعب كمال الاجسام تختلف عن حركة الناس العادين هاذي نقطة واتمنى اكون نبهت عليها والناس تستوعب هالشي ونصيحة
لوجه الله الي تجيه فرصة انه يلعب كمال اجسام لايقصر والعب ورح تشوف مع الوقت كيف حياتك بتتغير اول شي رح يصيرلك غير الجسم انه ثقتك
بنفسك رح تتطور وتزيد بشكل غير طبيعي ورح تحس حالك امير زمانك قسم بالله بحكي جد وانا تارك الحديد لي فترة ومتندم على هالشي لاكن قريبا
رح ارجع وارجع بقوة طيب ماعلينا خلينا نكمل القصة لما تعرفت على الزلمة وحسيت انه ثقة سئلتو عن كيف بقدر استبدل رخصة من دولة لدولة الاردن
قالي بسيطة كتير ولوبدك هات 35 دينار وبضبطلك احلى رخصة وانا هون انبسطت وفرحت كتير وقلت خلاص كل هالتعب رح يروح ورح اطلع رخصة
مع العلم انه الي سنة ونص مالمست موقد يعني سواقة السيارة ونفسي ارجع واسوق ففي هاي اللحظة كانه واحد احياني من جديد واعطاني امل في هالحياة
البائسة انه خلاص رح تنحل كل مشاكلي بعد مانطلع هالرخصة فقلتله تمام المهم اتفقنا وقالي خلاص بكرا بتجيب اوراقك ومعهم ال35 ليرة ورح اروح للزلمة
عشان يبدا بالاجرائات . بعدها قلتلو خلاص ابشر وثاني يوم اجيت وجبت معي كيس كنت مخبي في الاوراق وكل شي وقلتله تفضل المهم الزلمة اخذ
الاوراق وقالي خلاص اليوم بميل على الزلمة تبع السواقة وبضبطلك الوضع قلتلو والله يامعلم لوتضبطني اضطبك واجبلك الي بدك ياه والك مني احلى
حلوان يحلى بقك الزلمة هون قالي لاشكرا مابدي منك شي اهم شي انه توصلك رخصتك بس شوفو انتو اسلوب النصب الاحترافي في اهل الاردن
صار يحكيلي انا مابدي منك شي بس لما يجي الزلمة يعني لماتخلص الرخصة ويجي يسلمني ياها الزلمة اعطيه قهوة ومعها باكيت دخان قلتلو بس ابشر
بدل الباكيت رح اجبلو كروز 
المهم هون كانت بداية النصبة بعد 3ايام اجاني قصي على جمب وقالي الزلمة بدالك بالاجرائات ورخصتك بالكثير يوم الثلاثاء بتكون عندك انا هون كيفت
كتير ومش عارف شو بدي اعمل قلتلو تمام قالي بس في مشكلة صغيرة قلتلو شو ؟ قالي بدنا صورة عن الرخصة السعودية + صورة عن الهوية
ابن الحلال طابخة طبخ قلتلو تمام وياجماعة انا والله ماكان عندي وقت اني اروح اصور اي شي كنت اول مارجع من الشغل اكون تعبان ومهلوك يعني على طول
اروح وامسك بالفراش وانام ومرات كنت انام وانا على الكنابية يعني ماكان عندي وقت اني اسوي اي شي فهون انا غصبت على حالي وقلت خلاص اليوم
بحاول ارجع بدري وابكر واروح اصور الاوراق واسلمها للزلمة ولما رجعت الساعة 10:30 رحت ادور على مكان للتصوير والحمدلله لحقت قبل مايسكرو
صورت اوراقي وكل شي وهيك امورنا كلها بالسليم رحت حطيت راسي بدي انام وارتاح التلفون دق رديت الو قصي كيف حالك ياخال ....
قالي حبيبي عبد بس بدي اذكرك على شي جيب معك مبلغ 15ليرة مع الصورة قلتلو تمام وبعدها حطيت راسي لين اليوم الثاني اجيت رحت لقصي اعطيتو
الاوراق المطلوبة ومعها ال15ليرة هيك قصي صار معه 50دينار وانا ليسا لهون ماني فاهم انه ناصب علي المهم الزلمة قالي خلاص الخميس ان شاءالله
بتكون معاملتك جاهزة وبتستلمها وبنفس الوقت انا عندي الك مفاجئة حلوة كتير قلتلو شو هي؟ قالي بعد ماتستلم رخصتك بتعرف ؟ قلتله تمام
وانا حاط براسي شو هي هالمفاجئة مابعرف المهم رجعت للشغل وكنت مبسوط لدرجة غير طبيعية خلاص رخصتي رح تجيني لباب بيتي كلها بس يومين
وشربت الزلمة قهوة عى حسابي + عزمتو على شاورما ياجماعة لاتفكرو انه بممن الزلمة انه عزمته لاوالله بس بحكي هيك لانه كنت مبسوط والزلمة
كان ينصب علي بدون ماحس ولا اعرف شي وهو اصلا حابكها من البداية وعارف كيف ينصب وبطريقة مستحيل انه تنكشف المهم استنيتو لصار يوم الخميس
الزلمة ماجاش على الشغل قلت اتصل عليه شوف ايش فيه الو مرحبا قصي كيفك ياخال اخبارك والله الحمدلله حبيبي عبد شو مالك يازلمة ليش ماجيت تدوام
في شي ؟ والله حبيبي عبد المرا سقطت والولد مات  الله يصبركم ياصاحبي وقفلت السماعة بعدها وثاني يوم اجا قصي للدوام ها كيف ياخال
انا اسف كثير لانو مات الولد ومن هالحكي ... والله زعلت عليكم وبجد انتو مابتساهلو هيك وبلا بلا بلا لا
المهم الزلمة اجاني وقالي ماقدرت اروح للزلمة اشفلك ايش القصة عشان الزلمة وهيك قلتلو لاه ياصاحبي اهم شي مرتك وكيف صحتها
تمام مافيها شي الحمدلله الله يعوضكم ياصاحبي وان شاءلله هذا الولد رح يكون شفيع لكم بالاخرة....
المهم بعد يومين من الحادثة حكيت مع قصي قالي خلاص هسا امورك كلها تمام ويوم الاحد بتكون طلعت رخصتك بس بدنا 20ليرة رسوم الرخصة
قلتله ابشر ياصاحبي متى اجبلك ياها اليوم ولا بكرا قالي الي بدك ياه بس لوبتبكر فيها وتجيبها هسا بعد الدوام بيكون احسن عشان كل ماجبتها بكير
رخصتك بتطلع بكير قلتله خلاص تمام بجيبها بكرا قالي بكيفك المهم جبتها ثاني يوم واستنيت لين الخميس ماصار اي شي هون الزلمة كان خلاص
تارك الشغل ومودع من عنا وماعندي غير رقم تلفونه المهم اتصلت عليه الساعة كانت 7 المسا الزلمة بيحكلي والله ماحكيت مع الزلمة لهسا
لانه في الدوام .... شيت الساعة7 اي دوام بتحكي ياصاحبي المهم سكرت الخط واستنيتو لين صار لاحد اتصل عليه ماحد برد ضليت اتصل لين حرقت الخط
رد علي وقالي حبيبي عبد هسا عندي اوردير احكي معي كمان شوي قلتلو تمام المهم استنيت ساعة بعدها دقيت ها شو صار معلم الرخصة؟؟؟
قالي والله ياصاحبي سامحني انا صارلي يومين مسجون ومافضيت احكيلك مع الزلمة خلاص اليوم بحكي معاه وبردلك خبر على المغرب قلتله اوك
وهون ياجماعة انا عرفت انه انتصب علي 100% المهم بعد المغرب اتصلت بالزلمة بيحكلي حبيبي عبد انا بدي منك خدمة قلتلو تفضل ؟
انا مزنوق على مبلغ ومش عارف من وين اطلب ! اخو الشلن مفكرني جاجة بياضة ولا بنك الاسكان @@ المهم قلتلو كم المبلغ
قالي 150ليرة لو بتقدر ياحبيبي قلتلو ول 150ليرة من وينلي وانت بتعرف اني فنشت من الشغل وكل الي معي 50ليرة قالي دبرلي من اي حدا
قلتلو والله ياحبيبي ياقصي عيوني لك بس هسا مامعي هالمبلغ قالي طيب شكرا وبعدين بنحكي عشان رخصتك يلا سلام ...
المهم انا هون عرفت انه قصي طلع ابن .... وتم النصب عليه بكل شكل من الاشكال ومصاري مستحيل ترجع ولا في رخصة ولا في نيلة
المهم انا قلت خلاص ضيعت 3 اسابيع اركد على رخصة خليني اروح اطلعها بنفسي المهم رحت وسئلت الشباب وكل واحد بيحكي قصة وموضوع شكل
واحد بيحكلي لا مابتطلعلك وواحد بيحكي بتطلعلك وواحد بيحكي لازم تسوي اختبار بصر وقيادة ومش عارف شو المهم انا هون تشوش كل فكري
وكل واحد بيحكي شي حتى اخوي قالي انه صعبه تطلعلك وبدك كتاب من الوزير والوزير رح يشنططك ل 3شهور وصعبة تطلعلك المهم ماهتميت
لكل هالحكي الفاضي وانا بالشارع لقيت رقيب سير كيف حالك سيدي؟ تفضل سيدي هسا الي معو رخصة سعودية بيقدر يبدلها بااردنية؟؟؟
سيدي قال لا @@ المهم رحت على النت ونبشت بالمواضيع وشفت انه يمكن استبدال الرخصة السعودية لاردنية بشوية رسم تدفعها ورخثتك تكون عندك
المهم ماصدقت لين شفت موضوع موثق بموقع ادارة رقابة السير وشفت كل الشروط المطلوبة + مبلغ 134دينار وبتطلعلك الرخصة وانت مغمض
المهم رحت عشان ابدا اجرائات الرخصة وهذا بعد ماستعتن بكل اقربائي واصدقائي والشباب وكل الناس وكله على الفاضي بعدين رحت لوزارة الداخلية
عشان اجيب كتاب اعفاء من وزير الداخلية سئلت الحارس الي برا قالي هاد بدك تروح على سلامة السير في طبربور قلتله معلم انا شفت بالموقع بيحكو
انه وزير الداخلية بيعطي الكتاب قالي ادخل اسئل وشوف المهم دخلت وسئلت الشباب الي على الكاونترات وقالولي بدك تراجع سلامة المرور الي في طبربور
المهم رحت اخذت تاكسي وقلتلو على سلامة المرور ووداني ورحت هناك وحكيت مع الاستقبال الطابق الثاني المكتب الي على اليمين رحت وقدمت طلب
اخذو مني صورة عن رخصة القيادة السعودية +الهوية عشان يسجلولي طلب اعفاء من الوزير وقعت على الطلب قالولي راجعنا يوم الخميس واليوم
الي قدمت في كان الاثنين يعني 3ايام والكتاب يكون بيدي قلتلهم تمام المهم رحت البيت ريحت شوي
هسا صار الخميس قمت على الساعة 9 عشان لازم الدوائر الحكومية تروحلها بكير فرحت قمت على السلامة المرورية بتفاجئ انه طلعلي الكتاب اخذتو
وبوجهي على ادارة السير الي في ماركا رحت قدمت طلب الطلب ماخذ مني نص ساعة والرخصة عندي  دفعت 135دينار من غبائي بقول للشرطي
الباقي لك وهون كنت رح البس بقضية رشوة لووووول المهم هون ياحلوين انا خلصت معاملتي وطلعت الرخصة وبالنهاية اتمنى انكم استفدتو من قصتي
واسف لوطولت عليكم واستنوني بقصص ثانية ونصيحة لكل حدا متغرب انه يحذذذذذذذذر الف مرة من اهل الاردن سؤاء شباب او صبايا الكل هون اولاد
حلال وناس جوعانين الا من رحم ربي بس بجد الوضع هون بيخزي وياليتني ضليت بالسعودية صحيح في كفيل وقرف لاكن حياة ثانية في نصابين
لاكن مش بهالشكل هناك تعيش حياتك مع سيارتك شغلك بتشتري الي بدك ياه معك مصاري مو مثل الاردن مامعك شي
اسف على الاطالة
متطلبات استبدال الرخصة الاجنبية بااردنية
اول شي هاذي الاوراق بتوديها للسلامة المرورية في طبربور عشان كتاب الاعفاء
الي بيعفيك من اختبار القيادة واختبار البصر رح يكون في ماركا هو مو اختبار ولا شي بتقعد على كرسي وتشوف السبورة ومن اول حرف رح تنجح
كثير كثير الشباب متساعدين فلا تاكل هم رخصتك رح تستلمها باقل من نص ساعة 
متطلبات الحصول على كتاب اعفاء من وزير الداخلية
1-صورة عن الهوية الوطنية
2-صورة عن رخصة القيادة
وتراجعهم بعد 3 ايام
بعدين تروح على ماركة الشمالية وتاخذ معك مببلغ 135ليرة
وتشوف الشروط الي تحت
1-صورة عن رخصة القيادة + رخصة القيادة الاصلية
2-صورة عن الهوية الوطنية+ الهوية الاصلية
3-صورة عن دفتر العلم+دفتر العلم الاصلي
4-صورة شخصية حديثة
4x6
5-دفع مبلغ 135دينار
والف مبروووك الرخصة
موقع ادارة السير لمزيد من التفاصيل
:
واي استفسار تفضلو 

تعليقات

إرسال تعليق